بيحكيني القمر رسام
قصيدة للشاعر كرم محمد حربي باللهجة العامية المصرية
انا في الحب يحكيني القمر رسام
على الصوره فروع الورد بتزهز على الاغصان
عصافير الفؤاد بتطير مع المعنى وبتغني
وانا من لهفتي وشوقي رسمت الصوره ع الألحان
عيون فى القلب تتمنى رؤاك ياحبيب
حنين بيطل م الشبابيك ينادي عليك
حروف منسوجه جوا خيال بتتمنى تقولك شعر
ولما الوصف والمعني بيتقابلوا معاك بتغيب
مفيش فى الهوى توبيخ ولا تأنيب
بتغضب ليه على روحك وتكسر فيها اشواقك
حنين القلب مش جمله ولا رسمه تشكِّلها
حظوظ الحب ياقلبي وكله نصيب
فبسأل نفسي واتحاور مع روحها
واقول لو يحن القلب مين يقدر،
يطفي النار وأشواقي ومين يقدر
يداوي فينا مجروحنا
تقول روحي بلاش تبكي،
بلاش بالدمع تحكينا وتحكيها
ف ليه الحب مش واضح ومش سالك
غيوم ع العين بتحجب فيها تفاصيله
سراب ممدود على مد الرؤى فينا
تقرَّب منه أشواقك،
تضيع روحك في تَشكيله
أنين القلب لو ينطق ويحكيلك
هتبكينا الليالي السود
وترفض فينا تأويله
وتسكن جوا قلب الصمت
فيطرح فيك بذور الخوف
وتهرب من سطور الشعر
وتسكن جوا تفاعيله