احترت ياصاحبي
وسعت منك جوا الدايره وصوتك راح
وسمعت كلام وكلام وكلام
وجموع الناس فى الدايره في كل صباح
محتاجه الدعم.
بُص لحالك!
ايوا ياعم
وشوف القصه رايحه لفين
سطرين اتنين
ومابين الكلمه في اول جمله واخر سطر
هتعرف صوتك رايح فين
الكل يقول
انا ابن الشعب وشايل حمل الناس مُهتم
انا هخدم بلدى واخفف عنها حمول الهم
وهتاف شغال من اول يوم بالروح بالدم
وسؤال بيدور فى عقول الكل
هترشح مين؟
وصوتك فين في الدايره ياعم؟
معلش ياصاحبي، انا بيك مهتم!.
كام صوت راح تدِّي،
وصوتك من بدرى، محسوب على مين؟
وشباب محتار
وفى ليل ونهار
مشغول مش فاضي لأجل المَم
بيكافح لأجل اللقمة تكفِّي، في الصبح ولاده
مهموم بحياته، ولأجل ولادنا نشيل الهم
من أول صوره لضوء الشمس،
ومن أول أمس،
ممنوع اللمس.
من كُتر الوجع اللي في أيامه خلاص،
ورمت رجليه،
روح بص عليه.
هتلاقي سنين العمر في وشه، تشبه لوحة فنان
هَيبَان من تجاعيد العمر، خطوط العمر
خطين للحزن بيفصل بينهم، خط الصبر
وطول ما الواحد فينا الروح جواه
بيعافر لاجل مابيني البيت وياه
على طول الخط الفاصل بين الجوع والفقر
خطوط للصبر،
بتمنع فينا الروح م الموت
وفى كل ساعات العمر تلاقي فينا، كفاح فى كفاح
أيوا انا فلاح وابويا فلاح والارض أهي بُور
ضمينا القمح واول لقمه، وقفنا طابور!
ورغيف العيش يتجاب بالدور!
وحلمت اكمل يوم احلامى
وروحت هناك قدمت معاك
وكان من حبي لحلمى ليلاتي
مابنامش الليل
قدمت وظيفه وكان، تفاصيل الحلم،
طريقه طويل
وبعد شهور من،
روحنا وجينا
وكشف طابور
على هيئه وعيله
نجحت ولكن؛
ملكش نصيب
كان واحد غيره هناك بيقول
أنا واخد دوره وليا قريب
قرَّب أحلامه وفجأه يلاقي
لقريبه نصيب.
واخويا التاني أبو مجموع عالي
حب يقدم فى السلك العالى
لكن ياخساره مالوهش نصيب
قلبك طيب ياسعادة البيه
راح تعمل ايه
ما هوا كله نصيب
ابن الباشا هيفضل باشا
وانت هتفضل ابن الشعب
انت تناضل ويا خواتك
وانتا قانونك يسري علينا
وانتا تعيش الحاله في كرب
انت تقرر لينا حياتنا
واحنا هنرضىٰ بحلمك لينا
ما احنا رضينا زمان وخلاص
يعنى هتيجي فى لحظه علينا
لما ندور ع الإخلاص
لأ مش فارق،
صوت الصبر في قلب ضلوعك
صوتك طوعك،
واوعي تكون متقيد فيه
أيوا انا سامعك، بتقول إيه؟!
انزل شارك يمكن تلقى
فى صوتك جبر
يمكن تلقى فى قلمك
مره نقطة حبر
علم شارك يمكن تفرق
يمكن صوت الفرح هيغلب
صوت الكرب
يعني هتفضل عايش على أحلامك
حرر نفسك من اوهام فى حياتك صعب
صعب تحقق حلمك جوا ظلام
أو راح تعبر شط حدودك بالاحلام
كبر مخك من افكار هتضرك بيها
ساير حالك مشي امورك واسرح فيها
احلم لكن؛ حلمك ليك
جوا حيطانك مأسور بيك
احلم بس وصوتك واطي
احسن يخرس صوتك فيك
ياخوفي ياولدى من الأحلام
لتعيشها فى واقع وتأثر فيك
عيش فى حياتك زي ابوك
خالك عمك واللى جابوك
عيش زى الشعب ماعايش
اوعى تفكر صوت معاليك
راح يفرق حاجه
صوتك ليهم صرخة نمله
فى وسط حجاره
صوتك جوا حدود السمع ياروحي
وصوت الشعب دا اسمه حضاره