مدونة الزهراء الأدبية
"حرف مجبور ع الحنين"
الشاعر: (يُكتب هنا اسم الشاعر)
لما الاقي فجاه جاني
عقلي يسأل عن مكاني، بين سطور الشعر فين
لسه غايب من سنين؟
لسه بتخاصم حروفك، لسه بيها بتستهين؟
إنت فين م الشعر قوللي؟
ولا عايش والسنين؟
قوللي مين بالشعر قالك، حرف ناقص كسرتين
حرف مجبور ع الحنين، جوا رسم الصوره واضح دمعتين
ومنين لفين!
ولفين وفين، تحسب مجازك قول لفين
ومنين هترسم ليك لحالك خطوتين
مفروض عليك الشعر وانتا، لسه بتعافر وتسأل لمين وفين
جرَّب تقول الشعر مين غير الدموع
جرّب تجوع، يمكن تلاقي ليك رجوع
جرَّب تروح للشعر تطلب معنى ليه يمكن تلاقي فى حرف غيرك، طعم فكره وتشتهيه
جرب تدوق من كل ذوق
يمكن تفوق وتحس بيه
جرب تقطَّع جملتين
حرف ساكن بالحنين
وكسرة القلب الحزين
وفعل من افعال اخوه
إسمه شوق العاشقين
عارف لفين الشعر يوصل لو حزين!
جوا الضلوع فى القلب يُسكن غرفتين
عارف لفين الفرحه توصل لو حروفك فرحتين!
توصل لفوق الحد عن وصف الجمال ابو ضحكتين
ضحكة القلب اللي فيها الروح تروح
وضحكة عيون الحب تشفيلك جروح
تقدر تبوح؟
إوعاك ياواد تفضل تنوح.
إوعاك تروح.