قصاصات من ورق
ديوان شعر
فهرس المحتويات
خدنا إيه
خدنا إيه منها المشاعر
غير شوية حزن جوا العُمر بتمغص حياته
غير حكاوي لحد غاوي،
قال ينقطنا بسُكاته
حد قاللي في مره اكتب عن حبايبك
غني فيهم قول مشاعرك، قول قصايدك
ليه تزاحم حزن مش مكتوب عليك
ليه تنادي الدمع يسكن لك عنيك
ليه بتشغل بال حروفك بالحكايات اللي فيها اللون سواد
يعني لو فاضت مشاعرك خللي في حروفك حياد
يعني ممكن لو تحاول راح تلاقي
غير بلاوي قصاد عيونك واقفه مرسومه عليك
يعني ايه شاعر بيكتب ليه ونفسه
وجوا منه حد بيعلًَق عليه
ليه حروف الشعر يعني
جوا دايره وفيها دايره
وبره عنه الدنيا سايره
وفيها من شعره ودوايره
ليه تعاند فيه وليه برضوا بتقيد ايديه
قوة ياشاعر
قول ياشاعر، جُمله من وصف المشاعر
لما يجي طفل بُكره، يسألنا عن واقع وحاضر
ايه هَقوله عن تاريخ العمر وحكاية النزاع
ايه في قلب القصه مخفي وايه مذاع
قوله حاضر
كل حاجه وليها حسبة،
وحسبتي محتاجه شاطر
قاللي... ايه!
إيه حكاية الحسبة ديه
وليه حروفك مش عاديه
وجوا منها الف خاطر
حسبة الأحلام فى ليلها
وحسبة الواقع في نار
قصة الأمجاد تمللي
ماليه أوقاتنا بحوار
ولو بتسمع جنب مني
حد بيغني لحمار
قاللي بسمع كل ساعه
في الإذاعه انتافضة وكلمه عاده
مره دُره ثم مره دير ياسين
صابره وشاتيلا والحصيله
مين ومين.
فيها قصه والف حصه
تسرد الأحداث وتشرح
دمع محبوسه وسجين
مين ساندها ومين سندها
ومين بينهش لحم مين
قاللي سامع صوت هتاف بينادي بره ع القهاوي
قولت شوف الجون في مين
قال برشلونه والريال
والهتاف كان م العيال
والوشوش ماليان خوف
مين هيكسب مونديال
فجأة عاد الصمت تاني
والكلام حفنه فى وداني
واللي خدني واللي جابني
فوق سطور القصه قاللي
بص يا ابني
القصه فيها الف مجني عليه وجاني
قام وسابني
وفي ثواني راح ناداني
وقاللي حاول تبقى وطني
رغم إني مش أناني
قاللي وطنك قولت ماشي
قاللي أهلك قلت ماشي
قاللي قوم من جنبي وامشي
روحت ماشي